عذب القصيد
Published on سبتمبر 15, 2012
لا ضاق صدرك وازعجتك الدواكيك=وقامت همومك وسط صدرك تزنا
استغفر الله عن خطاك ومعاصيك=لين ان غيمات القلق ينجلنا
وادفن وسط حدب المحاني بلاويك=لو قيل لك فضفض لنا وبثهنا
الناس ياخل تلوعه مشاكيك=والا شموت بس يشتالهنا
وانته وش اللي من هدومك مجزيك=تحمد الله هم غيرك مثنا
تمشي على رجليك والله معافيك=وغيرك على بيض السراير يونا
كان الذي مزعجك شي بماضيك=ما انته معدل مايلات مضنا
مثل الرماد تحرثه لين يكويك=تنسى الهموم وترجع تعيشهنا
يانعمة النسيان وشلون اجازيك=لولاك كان الناس راحت مجنا
وان كان همك غيب مقبل لياليك=يمكن توفى قبل لا ياصلنا !!
الله خلقك وكافلك ما يخليك=يرزق خشاش الارض بجحورهنا
عش بس يومك وانبسط مع بني خيك=مافات مات وباكر بغيب عنا
والناس لو تركض برجلك واياديك=كايد رضاهم كلهم لا تعنا
اطلب رضا الله واترك الناس يرضيك=وتمشي لك الدنيا على ما تمنا
وعن كثرة الروحات قصر خطاويك=والواجبات آليا بدن لا تونا
ولسانك حصانك تفكه يدهويك=ولا تسرج خيولك على حساب ضنا
والهرج دامك ما سمعته باذانيك=لا جاك منا خله يروح منا
والأمر شاور به رفيق مصافيك=قدام سفن البحر لا يبحرنا
لو كان عرفك حسب ظنك يقديك=يمكن يشوف أمور ما شفتهنا
والرأي حلة لغز مابه تشاكيك=لو له مراميع له يتشابهنا
ومن لا يعرفك زين ينظر مخاويك=يوم الطيور تطير لاشباههنا
اما مدحوك الناس لا حل طاريك=والا يقال الله لا يمتحنا
جربت وأنشدني عن الناس وافتيك=وان كان ما سدتك رح خوضهنا
تجارب ما قلتها لأجل أوصيك=هجوس شاعر بالقصيد اطلعنا
Author: صقر ال علي
Posted in:
المستشار
الله يعطيك العافية أخوي صقر
ولاخلا ولا عدم من هالطله الجميله
ننتظر كل ماهو جديد من قلمك الرائع
ابو مطلق
اسمح لي ابدي اعجابي بقلمك وتميزك واسلوبك الراقي وتالقك
تقبل مروري ..
خ ـآلد
ابو ناصر
كعادتك ابو محمد مبدع دائما
في طرحك للجميل
وانتقائك الابيات الرائعه والهادفه
سلمت اناملك على موضوعك الاروع من رائع
لا عدمناك يالغالي
تقبل مروري ,,,
صقر ال علي
تشرفت بمرو رك العطر …. لاهنت اخوي
أبوعبدالله
يعطيك العافية على النقل
وصح لسان الشاعر
صقر ال علي
مرورك الجميل عطر متصفحي … أشكرك
سعد الجازع
والناس لوتركض برجلك واياديـك.
كايـد رضاهـم كلـهـم لاتعـنـا
اطلب رضا الله واترك الناس يرضيك .
وتمشي لـك الدنيـا علـى ماتمنـا
صح الله لسان شاعرها وتسلم يمناك
أعتقد انه ضيف الله الحصني الحربي
يعطيك العافيه على الآبيات الجميله
والأنتقاء العذب والراااقي راق لي ماخطته يمناك
دمت بخير